是否因為今年香港主辦東亞運動會，所以特別多比賽呢？

　　以下一則有關柔道總會的訪問，十幾年前入港隊個時都係哩班人執政又唔覺得當時咁黑暗。當年我係總會的比賽中贏個季軍就入咗港隊，仲有機會出外比賽，雖然只有一次咁多。但都叫做有機會見識外地的柔道水平，有機會見識港隊運動員的訓練方法。

　　我都奇怪點解樂樂佢地贏咁多次都未收到信入港隊受訓架啦，轉咗個計分制仲衰過舊時。

東亞運柔道賽黑箱選拔
2009年10月15日

年底舉行的東亞運動會醜聞不絕，花了十多億公帑仍門票滯銷，連選拔代表也傳出醜聞。
三名柔道運動員在今年選拔賽中贏得八金一銀佳績，遠超入圍標準，但最終無緣入選，他們揚言會在東亞運舉行期間，在場外示威贈興。有體育界人士指，各體育總會爭逐國際賽名額，除了為知名度，還欲取得政府每年高達一億八千萬元的體育資助。

「柔道比賽係擂台定生死，贏就贏，點解可以咁唔公平？」香港柔道學會創辦人黃柱光一腔怒火。黃現時在香港警察柔道會任教，不少徒弟為警員。他着力培訓三名徒弟參加東亞運，希望主場之利，贏取佳績。
「六月時，我哋自資去廣州跟廣東省柔道隊習訓。其中一個學生，係我太太，最記得佢喊住同我講，話希望喺香港參加東亞運，然後結束運動員生涯，咁樣最完美。」黃說。黃妻李嬪同另外兩名徒弟蕭世婷和 Florence，今年出戰三、六、九月全年僅有的三次香港柔道代表隊 A級選拔賽，結果李嬪拿到兩金一銀，蕭和 Florence更威，各拿三金。

遠超標準

選拔賽由香港柔道總會主辦，要在三場 A級賽事中，任何一場拿到季軍或以上，方可入選港隊。黃滿以為三名徒弟八金一銀的成績入圍無難度，怎料接近柔總人士私下告訴他：無可能。黃傷心地說：「我可以做啲咩？好在徒弟好支持我哋，話無得上擂台，十二月去比賽場館外示威，寧願東亞運之後，齊齊退出柔道界！」
由「出賽在望」變為籌備請願，黃教練挽着太太的手申訴，激動至揮動拳頭，太太李嬪說：「要打倒柔道總會入面嗰啲山頭，仲難過真正在擂台比賽。」
香港柔道總會由不同柔道屬會組成，是柔道界的最高機構，除作為最高領導人的會長貝均奇外，下面是負責行政的主席黃寶基，但實際執行者，主要是三名分別來自中華柔道會、遠東及香港柔道館的副會長，黃寶基與副會長李松泰屬香港柔道館同門，有指香港柔道館在總會內勢力最大，更視黃柱光為眼中釘，過去一直以他並非總會會員為由，排擠黃及他的徒弟參與選拔賽，直至去年黃多番向康文署投訴，今年總會才首次開出綠燈。
柔道運動員出身的黃柱光，八○年代多次獲選港隊，是本港柔道 A級賽事六十公斤以下組別冠軍。八四年，他原本代表香港出戰漢城奧運和世界柔道錦標賽，結果代表資格卻落在對賽成績較遜的當權派運動員身上，年少氣盛的他自立門戶，當起警察教頭來，自此與總會管理層結下樑子。
「我做運動員嘅時代，選拔贏咗，起碼有機會入港隊受訓，我太太叫做第二代，贏咗嘞，竟然連入隊嘅機會都無，仲衰過以前。總會嘅經費，七成由康文署資助，係公帑嚟，政府點解唔監管？咁樣只會扼殺有潛質嘅運動員，令到佢哋灰心離場，對香港的體育發展有咩好處？」黃反問。
香港柔道總會被小撮人壟斷，已是公開的秘密。○四年，逾百柔道教練曾發動遊行，抗議柔總黑箱作業，惜最終不了了之。曾任總會副會長的陳兆成就謂，因為不想同流合污，寧願辭職，「我以前喺總會內兼任教練主委，負責編寫教練課程，參與運動員選拔時，親眼見有人為自己屬會嘅運動員塗改出席率，又喺體能測試上遲按秒錶出蠱惑，幫自己友過關，咁點算公平競賽？其實總會班管理層來來去去嗰班人，佢哋參加國際賽事，出外集訓享免費旅遊，最重要係有利承包康文署撥款舉辦的訓練班，其他人想沾手都好難。」陳說。
對於質詢，香港柔道總會回覆謂有關選拔名單已交奧委會審核，由於程序進行中，未允公布名單，又強調根據網頁內的選拔制度，挑選代表隊運動員，不涉違規。而康文署則表示會跟進事件。據知，署方與總會及投訴運動員將舉行三方會議，但至今仍未定日期。
有知情人士就指，選拔爭議在不同體育總會時有出現，「總會掌管選拔權同資源，運動員唔聽話，分分鐘連政府撥款嘅課程都無得教，生存都成問題，咪講話代表香港。好似柔道總會咁，班執委做咗十年以上，主席黃寶基同副會長李松泰，來自同一個屬會，已經係一個山頭。」
根據康文署數字，本年向五十八個體育總會和廿六個體育團體撥款達一億八千五百萬元，用作參加國際賽事、體育培訓等。其中，香港柔道總會本年度獲政府撥款的經常性開支雖只有八十多萬，但經總會申請的特別撥款達一百三十多萬元，這尚未計康文署自○七年起，每年向各總會及中小學額外發放的三千萬元，用作「學校體育推廣計劃」的撥款。
「年初曾德成公布將柔道、空手道和桌球，定為具潛質發展項目，另撥七百萬元重點發展，政府俾咁多錢，結果只係成為一啲人嘅俱樂部，真係好悲哀。」自言對香港體壇心死的黃柱光，揚言會設立體壇苦主大聯盟的網站，號召受屈運動員走出來申訴。

　　妹師姐要返學，咁星期二班就由我頂上。見到以前班小朋友仍然係小朋友，不過就每個人都好似有四隻手，三個口。嘈到不得了！有個小妹妹，個個都叫佢甩頭妹妹（個花名點嚟？），雖然唔多出聲，但就四圍走，要佢行禮就唔知做乜係要企歪。而家啲細路係咪困得太耐，精力無處發洩，所以十個有九個都過度活躍呢？睇嚟哩班唔可能正正經經練習，又會變成育兒班。

　　太少人考帶，今次升級試取消，印象之中好似未試過。我只收到十三份表，黃考橙得三個，橙考綠一個，綠考啡多啲有六個，藍考啡三個。真係好難攪得成，不如要佢哋出去打比賽，贏到先俾升啦。

　　其實都有啲心酸，睇住個會由最頂峰時有百幾二百個學員，縮下縮下到而家得返都唔知夠唔夠五十人。再咁落去最後可能私人班收哂，得返康體班。

　　真係未參加過青少年的柔道比賽。我學個時都成２０歲啦，正式出道去打比賽都已經２１歲要打公開組。唔俾打乜唔俾打物真係未試過。今日响應東亞運動會帶隊去打青少年柔道隊際錦標賽，成績比預期中好，七隊之中得季軍，拉雜成軍算係咁啦。如果大雄，小強可以出山的話應該入到決賽的。

　　星期一康體班，有兩個少女白帶返咗嚟，而家有６個白帶。天晴又返咗嚟，下年隊際有希望啦。天晴休咗十年都仲咁好打，我都唔可以偷懶。

今日比賽片可以係我個YOUTUBE 道睇返。網址係http://www.youtube.com/user/gutsrice

　　又唔記得白帶係乜都唔識的。應該要好好保護佢哋，但係．．．。康體班第二堂得返四個白帶，精彩！黃帶焊仔仲俾gigi打傷埋。無得頂呀！

　　隊際賽師傅交俾我組隊，大獲！21歲以上好似得我一個咋喎，咁仲報唔報公開組好呢？17-21歲而家有9個人。分兩組定揀人出一組好呢？

　　嚟緊佢地又要遠征新加坡，希望唔好有人受傷啦。

　　聽聞體育節大家都有不愉快經歷，於是乎去中華盃睇下，反正啲裁判都係個幾個。

其中睇到哩場，裁判執法真係好掂。http://www.youtube.com/watch?v=17mpBsBqN1s&feature=PlayList&p=849135B6CBF152F5&index=2打緊都可以叫停，驚啲選手打得辛苦啦緊係。

　　當日下午的比賽片段。

http://www.youtube.com/view_play_list?p=849135B6CBF152F5

 

　　嚟緊七月又有人會離開我哋啦。

　　又嚟感冒，已經兩星期但仍未痊癒。今日帶熱身，跑步時已經覺得雙腳好重，要好用力先拎得起對腳，到筋斗拍蓆時感到有點呼吸困難，捱下捱下又撐到做完熱身。

　　之後幫小朋友做入式，瞓低起身十幾次，已經開始腳軟軟。最後亂取練習，同豬兜打咗陣已經開始喘氣，跟住再同樂樂打，打咗陣已經呼吸困難。

　　點解要咁搏呢？其實我想睇下自己係體力極差時可以做到咩情度，又或者我谷下谷下可以谷返好自己。

 

　　禾興班回復正常，意外地有兩個十年無見的師兄弟回歸。女學員仍然係「稀少種」。

　　終於要去考C級，都無乜點，預咗俾人吋俾人窒。不過呢有時俾人吋先會的起心肝去做好，我唔鍾意將個原因推落去「人地針對」道。雖然咁樣自己會覺得好過啲，但唔會進步。

　　其實好似今次咁一路做招，一路俾人捉錯處都係好事，好過上一次錯乜都唔知。當然有時太刻薄係會令人好難受，但總好過hea下hae下。